وزیراعلی بلوچستان میر سرفراز بگٹی کے عوام دوست وژن کے مطابق شہریوں کو معیاری اور بروقت طبی سہولیات ان کی دہلیز پر فراہم کرنے کے لیے ضلعی انتظامیہ گوادر متحرک

گوادر/پسنی: وزیراعلی بلوچستان میر سرفراز بگٹی کے عوام دوست وژن کے مطابق شہریوں کو معیاری اور بروقت طبی سہولیات ان کی دہلیز پر فراہم کرنے کے لیے ضلعی انتظامیہ گوادر متحرک ہے۔ اسی سلسلے میں ڈپٹی کمشنر گوادر نقیب اللہ کاکڑ کی ہدایت پر اسسٹنٹ کمشنر پسنی خسرو دلاوری نے رورل ہیلتھ سینٹر (RHC) پسنی کا تفصیلی دورہ کیا اور ہسپتال میں فراہم کی جانے والی طبی سہولیات، انتظامی امور اور عملے کی کارکردگی کا جائزہ لیا دورے کے دوران اسسٹنٹ کمشنر نے او پی ڈی، ایمرجنسی وارڈ، مختلف شعبہ جات، ادویات کی دستیابی، صفائی کی صورتحال اور مریضوں کو فراہم کی جانے والی سہولیات کا معائنہ کیا۔ انہوں نے عملے کی حاضری بھی چیک کی اور غیر حاضر ملازمین کی تفصیلات طلب کرتے ہوئے متعلقہ حکام کو قواعد و ضوابط کے مطابق ضروری کارروائی کی ہدایت کی اس موقع پر اسسٹنٹ ڈسٹرکٹ ہیلتھ آفیسر (ADHO) پسنی ڈاکٹر نذیر بلوچ نے ہسپتال کی مجموعی کارکردگی، ایمرجنسی ادویات کے کوٹے، دستیاب طبی سہولیات اور درپیش مسائل سے آگاہ کیا۔ اسسٹنٹ کمشنر نے عوام کو بلا تعطل اور معیاری طبی خدمات کی فراہمی کو یقینی بنانے، ادویات کی دستیابی برقرار رکھنے اور ہسپتال کے انتظامی امور کو مزید مؤثر بنانے کی ضرورت پر زور دیا اسسٹنٹ کمشنر خسرو دلاوری نے کہا کہ وزیراعلیٰ بلوچستان میر سرفراز بگٹی کے وژن اور ڈپٹی کمشنر گوادر نقیب اللہ کاکڑ کی ہدایات کے مطابق عوام کو بہترین طبی سہولیات کی فراہمی ضلعی انتظامیہ کی اولین ترجیح ہے۔ انہوں نے متعلقہ حکام کو ہدایت کی کہ ہسپتال میں نظم و ضبط، عملے کی حاضری اور مریضوں کو معیاری طبی خدمات کی فراہمی میں کسی قسم کی غفلت یا کوتاہی برداشت نہیں کی جائے گی۔