کوئٹہ کی ترقی، خوبصورتی اور تاریخی ورثے کی بحالی پر توجہ دینے کی ضرورت ہے: گورنر بلوچستان
کوئٹہ صرف بلوچستان کا دارالحکومت نہیں بلکہ پورے صوبے کی شناخت اور چہرہ ہے۔ یہ شہر اپنی منفرد تاریخ، ثقافتی اہمیت، خوبصورت قدرتی مناظر اور منفرد شہری تشخص کے باعث خصوصی مقام رکھتا ہے۔ اسی لیے ضروری ہے کہ متعلقہ صوبائی ادارے اور وزراء کوئٹہ کی ترقی، خوبصورتی میں اضافے اور تاریخی حیثیت کی بحالی کے لیے مؤثر اقدامات کریں۔
گورنر بلوچستان جعفر خان مندوخیل نے پاکستان مسلم لیگ (ن) کے رہنما مصلح الدین مینگل کی قیادت میں آنے والے وفد سے ملاقات کے دوران گفتگو کرتے ہوئے کہا کہ موجودہ حکومت کے دور میں کوئٹہ شہر میں کئی اہم ترقیاتی منصوبے شروع کیے گئے ہیں، تاہم شہریوں کو معیاری تعلیم، صاف پانی کی فراہمی اور بہتر صحت کی سہولیات فراہم کرنے کے لیے مزید مشترکہ کوششوں کی ضرورت ہے۔
انہوں نے کہا کہ بنیادی سہولیات ہر شہری کا حق ہیں اور یہی ایک صحت مند، ترقی یافتہ اور خوشحال معاشرے کی بنیاد بنتی ہیں۔ کوئٹہ کی رونقوں کی بحالی کے لیے صوبائی وزراء، پارلیمانی سیکرٹریز، اراکین اسمبلی اور متعلقہ محکموں کو مل کر کردار ادا کرنا ہوگا۔
گورنر بلوچستان نے کہا کہ مربوط منصوبہ بندی، شفافیت، احتساب اور ترقیاتی منصوبوں کے مؤثر نفاذ کے ذریعے کوئٹہ کی ترقی کو پائیدار بنایا جا سکتا ہے۔ انہوں نے اس بات پر زور دیا کہ شہر کی صفائی، عوامی اثاثوں کے تحفظ، ماحولیاتی شعور اور شہری ذمہ داری کے فروغ میں عوامی شمولیت انتہائی اہم ہے۔
جعفر خان مندوخیل نے کہا کہ کوئٹہ کی ترقی پورے بلوچستان کی ترقی سے جڑی ہوئی ہے۔ اگر کوئٹہ صاف ستھرا، خوبصورت اور منظم شہر بنے گا تو اس کے مثبت اثرات صوبے کے تمام اضلاع پر مرتب ہوں گے۔
انہوں نے کہا کہ کوئٹہ کو ترقی یافتہ اور مثالی شہر بنانے کے لیے حکومت اور عوام کو مشترکہ عزم کے ساتھ آگے بڑھنا ہوگا تاکہ شہر کی تاریخی اہمیت، خوبصورتی اور عوامی سہولیات کو بہتر بنایا جا سکے۔
