وزیراعلیٰ بلوچستان میر سرفرازبگٹی کی قیادت میں صوبائی حکومت کھیلوں کے فروغ، نوجوانوں کو مثبت سرگرمیوں کے مواقع فراہم کرنے اور خصوصی طور پر قومی کھیل ہاکی کی ترقی کے لیے کیے جانے والے اقدامات کے ثمرات سامنے آنے لگے ہیں۔عسکر خان
کوئٹہ 13 اکتوبر:2026; ڈائریکٹر جنرل پبلک ریلیشنز بلوچستان عسکر خان نے کہا کہ وزیراعلیٰ بلوچستان میر سرفرازبگٹی کی قیادت میں صوبائی حکومت کھیلوں کے فروغ، نوجوانوں کو مثبت سرگرمیوں کے مواقع فراہم کرنے اور خصوصی طور پر قومی کھیل ہاکی کی ترقی کے لیے کیے جانے والے اقدامات کے ثمرات سامنے آنے لگے ہیں۔ ان اقدامات کے تحت نہ صرف کوئٹہ بلکہ صوبے کے دیگر علاقوں میں بھی کھیلوں کے بنیادی ڈھانچے کی بہتری پر خصوصی توجہ دی جا رہی ہے۔اس سلسلے میں سبی میں ہاکی گراؤنڈ کی تعمیر کا کام مکمل ہو چکا ہے، جو علاقے کے نوجوان کھلاڑیوں کے لیے ایک اہم پیش رفت ہے۔ ان خیالات کا اظہار انہوں نے ایوب اسٹیڈیم کوئٹہ میں پاکستان ہاکی فیڈریشن، بلوچستان ہاکی ایسوسی ایشن، محکمہ تعلیم اور محکمہ کھیل کے اشتراک سے منعقدہ تقریب سے بطور مہمان خصوصی کیا۔ انہوں نے تقریب کے شرکاء سے خطاب کرتے ہوئے کہا کہ کوئٹہ کے علاقے مری آباد میں بھی ہاکی گراؤنڈ کی تعمیر مکمل کر لی گئی ہے، جہاں اب صرف لائٹس کی تنصیب کا کام باقی ہے، جو آئندہ چند روز میں مکمل ہونے کی توقع ہے۔مری آباد ہاکی گراؤنڈ میں لائٹس کی تنصیب کے بعد کھلاڑیوں کو دن کے علاوہ شام کے اوقات میں بھی پریکٹس اور کھیلنے کی سہولت میسر آئے گی، جس سے ہاکی کے فروغ، نئے ٹیلنٹ کی حوصلہ افزائی اور نوجوان کھلاڑیوں کی صلاحیتوں کو نکھارنے میں مدد ملے گی۔ انہوں نے کہا کہ وزیراعلیٰ بلوچستان کے ان اقدامات کو صوبے میں کھیلوں کے فروغ، نوجوان نسل کو صحت مند سرگرمیوں کی طرف راغب کرنے اور قومی کھیل ہاکی کو دوبارہ مقبول بنانے کی جانب ایک اہم پیش رفت قرار دیا جا رہا ہے۔ کھیلوں کی سہولیات میں اضافے سے بلوچستان کے باصلاحیت کھلاڑیوں کو اپنی صلاحیتیں منوانے اور صوبے و ملک کا نام روشن کرنے کے مزید مواقع میسر آئیں گے۔انہوں نے کہا ہے کہ قومی کھیل ہاکی کے فروغ اور ماضی کی کامیابیوں کی بحالی کے لیے سکولوں کی سطح پر کھیلوں کی سرگرمیوں کو فروغ دینا اور نوجوان کھلاڑیوں کو بہتر مواقع فراہم کرنا ضروری ہے۔ انہوں نے کہا کہ بلوچستان کے نوجوانوں میں بے پناہ صلاحیتیں موجود ہیں، جنہیں تربیت اور سہولیات فراہم کرکے قومی اور بین الاقوامی سطح پر ملک کی نمائندگی کے قابل بنایا جا سکتا ہے۔تقریب سے خطاب کرتے ہوئے انہوں نے مزید کہا کہ کوئٹہ کے 25 سکولوں کے طلباء میں ہاکی کٹس اور کھیلوں کا سامان تقسیم کرنا قومی کھیل کے فروغ کی جانب ایک اہم قدم ہے۔ تاہم نوجوان کھلاڑیوں کی صلاحیتیں نکھارنے کے لیے معیاری کوچنگ، باقاعدہ تربیت، کھیلوں کی سہولیات اور مسلسل حوصلہ افزائی بھی ضروری ہے۔
