جاپان میں جیون ساتھی کی تلاش کے لیے مصنوعی ذہانت کا استعمال، شادیوں میں اضافہ
دنیا بھر میں آرٹیفیشل انٹیلی جنس (AI) مختلف شعبوں میں انقلاب برپا کر رہی ہے، تاہم اب اس جدید ٹیکنالوجی کو شریکِ حیات کی تلاش کے لیے بھی استعمال کیا جا رہا ہے۔ جاپان نے اس حوالے سے ایک منفرد قدم اٹھایا ہے جہاں AI کی مدد سے مناسب زندگی کے ساتھی تلاش کرنے کا عمل تیزی سے مقبول ہو رہا ہے۔
جاپان کو کئی برسوں سے کم ہوتی شرحِ پیدائش اور شادیوں میں کمی جیسے سماجی چیلنجز کا سامنا ہے۔ اسی مسئلے سے نمٹنے کے لیے مقامی حکومتوں نے نجی کمپنیوں کے اشتراک سے AI پر مبنی میچ میکنگ سسٹمز متعارف کرائے ہیں، جو افراد کی شخصیت، دلچسپیوں، اقدار، طرزِ زندگی اور مستقبل کے اہداف کا تجزیہ کرکے موزوں شریکِ حیات کی تجاویز دیتے ہیں۔
اسی مقصد کے تحت ستمبر 2024 میں ایک خصوصی موبائل ایپ متعارف کروائی گئی، جس کا مقصد شادی کے خواہشمند افراد کو بہتر اور محفوظ انداز میں مناسب رشتہ تلاش کرنے میں مدد فراہم کرنا ہے۔
ایپ استعمال کرنے والے افراد کو اپنی شناخت کی تصدیق، غیر شادی شدہ ہونے کا قانونی ثبوت اور آمدنی سے متعلق ضروری دستاویزات جمع کرانا لازمی ہوتا ہے۔ اس کے علاوہ رجسٹریشن مکمل کرنے سے قبل ایک آن لائن انٹرویو بھی لیا جاتا ہے تاکہ صارفین کی معلومات کی درستگی کو یقینی بنایا جا سکے۔
حکام کے مطابق AI پر مبنی اس نظام نے خاص طور پر نوجوانوں میں شادی کے رجحان کو فروغ دیا ہے۔ ماضی میں کئی نوجوان روایتی میرج سروسز استعمال کرنے سے ہچکچاتے تھے، لیکن جدید ٹیکنالوجی کی بدولت اب وہ زیادہ اعتماد کے ساتھ اس عمل کا حصہ بن رہے ہیں۔
سرکاری اعداد و شمار کے مطابق اس پروگرام کے آغاز کے بعد جاپان کے مختلف علاقوں میں شادیوں کی تعداد میں اضافہ دیکھنے میں آیا ہے۔ حکومت کا بنیادی مقصد نہ صرف شادیوں کی شرح بڑھانا بلکہ مستقبل میں شرحِ پیدائش میں بھی بہتری لانا ہے۔
ماہرین کا کہنا ہے کہ اگرچہ مصنوعی ذہانت خود کسی رشتے کا حتمی فیصلہ نہیں کر سکتی، لیکن یہ ہم خیال افراد کو ایک دوسرے کے قریب لانے اور موزوں شریکِ حیات کی تلاش کو آسان بنانے میں اہم کردار ادا کر سکتی ہے۔
