مستونگ میں سیشن جج عبدالحکیم کاکڑ فائرنگ کے واقعے میں شہید، گن مین بھی جان کی بازی ہار گیا
مستونگ: بلوچستان کے ضلع مستونگ میں قومی شاہراہ پر نامعلوم مسلح افراد کی فائرنگ کے نتیجے میں سیشن جج عبدالحکیم کاکڑ اور ان کے گن مین شہید ہوگئے، جبکہ جوڈیشل مجسٹریٹ سمیت دو افراد زخمی ہوگئے۔
پولیس کے مطابق حملہ آور فائرنگ کے بعد موقع سے فرار ہونے میں کامیاب ہوگئے۔ واقعے کی اطلاع ملتے ہی پولیس اور دیگر قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا۔
شہداء کی لاشوں اور زخمیوں کو فوری طور پر قریبی اسپتال منتقل کیا گیا، جہاں زخمیوں کو طبی امداد فراہم کی جا رہی ہے۔
واقعے کے بعد عدالتی اور وکلا برادری میں شدید تشویش کی لہر دوڑ گئی ہے۔ حکام کا کہنا ہے کہ حملہ آوروں کی گرفتاری کے لیے مختلف مقامات پر کارروائیاں جاری ہیں، جبکہ حملے کے محرکات اور دیگر پہلوؤں کا تعین کرنے کے لیے تحقیقات کا آغاز کر دیا گیا ہے۔
دوسری جانب مختلف سماجی، قانونی اور سیاسی حلقوں نے حکومت سے مطالبہ کیا ہے کہ حملے میں ملوث عناصر کو فوری طور پر گرفتار کرکے قانون کے مطابق سخت کارروائی عمل میں لائی جائے۔ ساتھ ہی بلوچستان میں عدلیہ کے ارکان اور دیگر اہم سرکاری شخصیات کی سکیورٹی مزید مؤثر بنانے پر بھی زور دیا گیا ہے۔
