وزیراعلیٰ بلوچستان میر سرفراز بگٹی کے وژن کے مطابق صوبے کے ساحلی علاقوں کے ماہی گیروں کی فلاح، روزگار کے فروغ اور انہیں جدید سہولیات کی فراہمی کے لیے حکومت بلوچستان کی جانب سے عملی اقدامات کا سلسلہ جاری

گوادر/جیونی18اگست ۔ وزیراعلیٰ بلوچستان میر سرفراز بگٹی کے وژن کے مطابق صوبے کے ساحلی علاقوں کے ماہی گیروں کی فلاح، روزگار کے فروغ اور انہیں جدید سہولیات کی فراہمی کے لیے حکومت بلوچستان کی جانب سے عملی اقدامات کا سلسلہ جاری ہے۔ اسی تسلسل میں جیوانی میں گرین بوٹ اسکیم کی قرعہ اندازی اور سمندری طوفان سے متاثرہ ماہی گیروں میں امدادی چیکس کی تقسیم کے حوالے سے تقریب منعقد ہوئی۔تقریب میں رکن صوبائی اسمبلی گوادر مولانا ہدایت الرحمان بلوچ، اسسٹنٹ کمشنر جیونی طارق امام، ڈائریکٹر میرین فشریز گوادر احمد ندیم،معروف کاروباری شخصیت سیٹھ چراغ کلمتی،اسسٹنٹ ڈائریکٹر فشریز جیونی بشیر کاکڑ، اسسٹنٹ ڈائریکٹر فشریز گوادر شاہ فہد، وائس چیئرمین میونسپل کمیٹی جیوانی امان جان امان، وسیم صمد، اورنگزیب بلوچ، کونسلر ایم سی جیونی امام دلوش، وائس چیئرمین یونین کونسل گنز زاہد صالح، احمد ہوت سمیت محکمہ فشریز کے افسران، ضلعی انتظامیہ کے نمائندگان اور ماہیگیر برادری کی بڑی تعداد نے شرکت کی۔تقریب کے دوران گرین بوٹ اسکیم کی شفاف قرعہ اندازی کے ذریعے منتخب ہونے والے 8 خوش نصیب ماہی گیروں میں کشتیاں تقسیم کی گئیں۔ حکام نے بتایا کہ گرین بوٹ اسکیم کا مقصد مقامی ماہیگیروں کو جدید اور بہتر سہولیات فراہم کرنا، ان کے روزگار کے مواقع میں اضافہ، ماہی گیری کے شعبے کو فروغ دینا اور ساحلی آبادی کو معاشی طور پر مستحکم کرنا ہے۔اس موقع پر سمندری طوفان سے متاثرہ ماہی گیروں میں امدادی چیکس بھی تقسیم کیے گئے تاکہ قدرتی آفت کے باعث ہونے والے نقصانات کا ازالہ کرنے میں متاثرہ خاندانوں کو مالی معاونت فراہم کی جاسکے۔تقریب سے رکن صوبائی اسمبلی گوادر مولانا ہدایت الرحمان بلوچ، ڈائریکٹر میرین فشریز گوادر احمد ندیم اور اسسٹنٹ ڈائریکٹر فشریز جیوانی بشیر کاکڑ نے خطاب کرتے ہوئے کہا کہ بلوچستان کی ساحلی پٹی میں ماہی گیری لاکھوں افراد کے روزگار کا اہم ذریعہ ہے، اس لیے ماہی گیروں کی معاشی خوشحالی، جدید سہولیات کی فراہمی اور بنیادی مسائل کا حل حکومت کی ترجیحات میں شامل ہے۔ انہوں نے وزیراعلیٰ بلوچستان میر سرفراز بگٹی کی جانب سے ساحلی علاقوں کی ترقی اور ماہی گیرہی برادری کی فلاح کے لیے اٹھائے جانے والے اقدامات کو سراہا۔مقررین نے کہا کہ گرین بوٹ اسکیم جیسے فلاحی اقدامات سے نہ صرف ماہیگیروں کے روزگار کو تحفظ ملے گا بلکہ مقامی معیشت کو بھی تقویت حاصل ہوگی۔ حکومت بلوچستان ساحلی علاقوں کے عوام کو معاشی سرگرمیوں کے مواقع فراہم کرنے اور ان کے معیارِ زندگی کو بہتر بنانے کے لیے دستیاب وسائل بروئے کار لا رہی ہے۔تقریب کی نظامت انسپکٹر فشریز جیوانی نور بلوچ نے انجام دی۔ماہی گیرہی برادری نے گرین بوٹس کی فراہمی اور طوفان سے متاثرہ ماہی گیروں میں مالی امداد کی تقسیم کو خوش آئند قرار دیتے ہوئے حکومت بلوچستان، محکمہ فشریز، ضلعی انتظامیہ اور رکن صوبائی اسمبلی گوادر مولانا ہدایت الرحمان بلوچ کا شکریہ ادا کیا۔ ماہی گیروں نے کہا کہ ساحلی معیشت میں ان کا بنیادی کردار ہے، تاہم انہیں کشتیوں، جیٹی، فش لینڈنگ پوائنٹس، کولڈ اسٹوریج، جدید آلات اور دیگر بنیادی سہولیات کے حوالے سے مزید تعاون کی ضرورت ہے۔ماہی گیر برادری نے امید ظاہر کی کہ وزیراعلیٰ بلوچستان میر سرفراز بگٹی کی قیادت میں حکومت بلوچستان ساحلی علاقوں کی ترقی اور ماہیگیروں کی فلاح کے لیے جاری اقدامات کو مزید وسعت دے گی، جس سے گوادر اور جیوانی سمیت بلوچستان کی پوری ساحلی پٹی میں روزگار کے مواقع بڑھیں گے اور مقامی آبادی کی معاشی حالت مزید مستحکم ہوگی۔