ہمیں عوامی وسائل کے مؤثر استعمال اور خدمات کی فراہمی میں تیزی لانے کے لیے جدید ٹیکنالوجی کو اپنی کاروائیوں میں شامل کرنا ہوگا۔ شکیل قادر خان

کوئٹہ 23 ستمبر: ـچیف سیکرٹری بلوچستان شکیل قادر خان کی زیرِ صدارت اجلاس میں محکمہ پاپولیشن ویلفیئر اور کوئٹہ میٹروپولیٹن کارپوریشن (MCQ) کی دو سالہ کارکردگی رپورٹس پیش کی گئیں اور مستقبل کے لیے لائحہ عمل پر تبادلہ خیال کیا گیا۔ اجلاس میں محکموں میں اصلاحات، شفافیت اور ڈیجیٹائزیشن کو ترجیحی بنیادوں پر اپنانے پر زور دیا گیا۔ اجلاس میں متعلقہ محکموں کی جانب سے گزشتہ دو سالہ کارکردگی، منصوبہ بندی، بجٹ کے خرچ اور عوامی خدمات کی فراہمی کے بارے میں تفصیلی بریفنگ پیش کی گئیں۔ پاپولیشن ویلفیئر نے آبادی کی ٹریکنگ، فیملی پلاننگ اور صحت عامہ کے پروگراموں میں اپڈیٹ کردہ ڈیٹا بیس کی رپورٹ پیش کی۔ کوئٹہ میٹروپولیٹن کارپوریشن نے صفائی، ضلعی انفراسٹرکچر، ضلعی روڈ نیٹ ورک، ماحولیات اور ضلعی ٹیکس و ریونیو اکٹھا کرنے میں کی گئی کوششوں کا تفصیلی جائزہ پیش کیا۔ چیف سیکرٹری نے کہا کہ عوام کو بہتر اور بروقت سروس فراہم کرنے کے لیے ڈیجیٹل حل ناگزیر ہیں۔ انہوں نے ہدایت کی کہ دونوں محکمے فوری طور پر ڈیجیٹل پلیٹ فارمز اپنائیں، ڈیٹا بیس کو مربوط کریں اور شفافیت کے لیے آن لائن مانیٹرنگ میکانزم متعارف کروایا جائے۔ انہوں نے کہا کہ ہمیں عوامی وسائل کے مؤثر استعمال اور خدمات کی فراہمی میں تیزی لانے کے لیے جدید ٹیکنالوجی کو اپنی کاروائیوں میں شامل کرنا ہوگا۔ اجلاس میں کوئٹہ میٹروپولیٹن کارپوریشن کی مالی خودمختاری اور آمدنی بڑھانے کے طریقوں پر خصوصی غور کیا گیا۔ چیف سیکرٹری نے QMC کو ہدایت کی کہ وہ اپنے موجودہ ریونیو ذرائع کا دوبارہ جائزہ لے، پراپرٹی ٹیکس، یوٹیلیٹی فیسز، اور مارکیٹنگ و پارکنگ کے نظام کو بہتر بنائے، اور عوامی مراعات کے ساتھ کم از کم ٹیکس چوری اور بھاری واجبات کی وصولی یقینی بنائے۔ انہوں نے کہا کہ میٹروپولیٹن کارپوریشن کی مضبوط مالی حیثیت مقامی ترقی کی ریڑھ کی ہڈی ہے۔ آمدنی بڑھانے کے عملی اور شفاف طریقے وضع کیے جائیں۔