کرسٹیانو رونالڈو اب فٹبال کے بعد ہالی ووڈ میں جلوہ گر ہونے کو تیار، پہلی ٹی وی سیریز ‘ڈے ونز’ کا اعلان

عالمی شہرت یافتہ پرتگالی فٹبالر کرسٹیانو رونالڈو اب میدان کے ساتھ ہالی ووڈ کی چکا چوند دنیا میں بھی اپنے جوہر دکھانے کے لیے تیار ہیں۔ اگرچہ وہ حالیہ ورلڈ کپ میں اپنی ٹیم پرتگال کو ٹرافی جتوانے میں کامیاب نہیں ہو سکے اور ان کی کارکردگی بھی زیادہ نمایاں نہیں رہی، لیکن دنیا بھر میں ان کی مقبولیت کا ڈنکا آج بھی اسی طرح بج رہا ہے۔

فٹبال کی دنیا میں انمٹ نقوش چھوڑنے کے بعد اب رونالڈو نے ہالی ووڈ کا رخ کر لیا ہے اور جلد ہی وہ ایک بڑی ٹی وی سیریز میں نظر آئیں گے۔ غیر ملکی میڈیا رپورٹس کے مطابق، کرسٹیانو رونالڈو اس پراجیکٹ میں نہ صرف اداکاری کے جوہر دکھائیں گے بلکہ وہ اس کے ایگزیکٹو پروڈیوسر کے فرائض بھی انجام دیں گے۔

النصر کے کپتان کی اس پہلی اسکرپٹڈ ٹی وی سیریز کا نام ‘ڈے ونز’ (Day Ones) ہے، جسے ان کی مشترکہ پروڈکشن کمپنی ‘یو آر-مارو اسٹوڈیوز’ (UR-Maroo Studios) تیار کر رہی ہے۔ اس اسٹوڈیو کو رونالڈو نے معروف ہدایت کار میتھیو وان کے ساتھ مل کر قائم کیا تھا۔

اس ڈرامے کی شاندار کاسٹ میں فٹبال کے سابق فرانسیسی اسٹار تھیری ہنری، معروف اداکار ڈیمین لیوس، برطانوی ریپر ڈیو اور اداکارہ کارلوٹا بنات شامل ہیں۔ سیریز کا مرکزی خیال فٹبال کے گرد گھومتا ہے اور اس کی کہانی ایک فرضی فٹبال ایجنٹ اسٹینلے ڈالٹن کے ارد گرد بُنی گئی ہے، جو جدید فٹبال کی رنگینیوں کے پیچھے چھپی طاقت، سیاست اور سخت مقابلوں کا سامنا کرتا ہے۔

رونالڈو کے چاہنے والوں کے لیے یہ ایک انتہائی خوشخبری ہے کہ اس سنسنی خیز ڈرامے کی شوٹنگ کا باقاعدہ آغاز ہو چکا ہے اور اس وقت شمال مغربی لندن میں اس کی عہدیہ کاری جاری ہے۔