تین روزہ تعطل کے بعد بلوچستان میں موبائل انٹرنیٹ بحال
کوئٹہ (اے این این) تین روز تک خاموش رہنے والی بلوچستان کی موبائل انٹرنیٹ سروس بالآخر دوبارہ بحال ہوگئی، جس کے ساتھ ہی کوئٹہ سمیت مختلف اضلاع میں آن لائن دنیا سے شہریوں کا رابطہ بحال ہوگیا۔
موبائل انٹرنیٹ کی بندش نے صرف سوشل میڈیا تک رسائی ہی محدود نہیں کی بلکہ طلبہ کی آن لائن تعلیم، فری لانسرز کے کام، کاروباری لین دین، ڈیجیٹل سروسز اور روزمرہ رابطوں کو بھی متاثر کیا۔ کئی افراد کے لیے تین دن تک انٹرنیٹ کی عدم دستیابی معمول کے کاموں میں رکاوٹ کا باعث بنی رہی۔
سروس بحال ہوتے ہی شہریوں نے اطمینان کا اظہار کیا اور معمول کی آن لائن سرگرمیاں دوبارہ شروع کردیں۔ شہریوں کا کہنا ہے کہ آج کے دور میں موبائل انٹرنیٹ محض تفریح کا ذریعہ نہیں بلکہ تعلیم، روزگار، کاروبار اور فوری رابطے کی بنیادی ضرورت بن چکا ہے۔
آن لائن کاروبار اور فری لانسنگ سے وابستہ افراد کے مطابق انٹرنیٹ کی اچانک بندش سے نہ صرف کام متاثر ہوتا ہے بلکہ بعض اوقات اہم مواقع اور مالی نقصان کا بھی سامنا کرنا پڑتا ہے۔
